aise hote hain pitah

jeevan mila jinse, woh jeevandaan hai pitah,
pukara jaaye chaahe kisi bhi bhasha mein
kehkar papa, baba, babuji...
har boli mein inke liye hai 

wahi pyaar aur samman bhara.

thaame jinki ungli bachpan challa,
jinki majboot kandhon par baithkar duniya dekhi,
godh par baith kiye nakhere dher jinke,
jinhone apne sneh se hamein bada kiya,
woh hai pitah!

choti se choti jeet par bhi jinse shabashi mili,
har haar ko jinhone sikh bataya,
nirash ko door bhagaya,
jeevan ki sachaai se hamein rubaru karaya,
sahi aur galat mein antar samjhaya,
jinhone apne bachoon ke sukh mein hi apna sukh paya,

bachoon ke liye har pareshani haskar uthaaya,
jinki puri sansaar unke bachoon mein hi samaya,
woh hain pitah!

kabhi kadak ho jaate to kabhi naram bade,
lagate hain pabandiyan to kabhi dete hain choot puri,
kabhi hansaate hain to kabhi rulaate hain,
kabhi maa ki daat-maar se bachaate hain,
to kabhi khud hi chapat laga dete hain,
aise hote hain pitah!

pyaar se thapki dekar sulaate hain,
to kabhi khana banakar apne haathon se bhi khilaate hain,
jarurat ho to maa ke bhi saare kartavya nibhate hain,
din raat mehnat kar apne bachoon ke bhavishya ko sawarte hain,
har din, har pal unke ujjwal bhavishwa ke hi sapne bunte jaate hain,
apne har saans ko pitah apne bachoon par lutaaate hain,
kabhi kathor hokar to kabhi mom ki bhaati pighal jaate hain pitah!

aapki bhumika kayi roop se hai...
dhoop gar jalaye to chaao ban jaate hain,
wahi samay aane par ussi dhoop mein tapkar jeena sikhate hain,
baatein jinki hamesa maargdarshan karti hai,
kathinayion se lardte huye, viparit paristhithi mein bhi,
apne sidhanton par chalna sikhate hain,

sath mein ho yaa yaad mein,
inki upastithi hamesa mann ko sukun pohuchati hai,

aise hote hain pitah!

majhdhaar mein banke rahe pattvaar pitaaji

duniya ko bataate rahe majhdhaar pitaaji,
majhdhaar mein banke rahe pattvaar pitaaji,

saaya bhi unhi se hai, sahaara bhi unhi ka,
bachchon ke liye dar hai aur deevaar pitaaji.

chullha na pade thanda kabhi isleye aksar,
hansakar gaye hain kaam par beemaar pitaaji,

maa ke bimaari mein bachche, roti aur baratan,
aksar nibhaate maa ka bhi kiradaar pitaaji.

hain dost, alaarm, guru, to pabandiyaan kabhi,
thappad, nasihatein, kabhi akhabaar pitaaji.

maa-baap ki sewa hi sabse badi puja hai

pitah jeewan hai, sambal hai, shakti hai,
pitah shristi ke nirmaan ki abhi-bhyakti hai,

pitah ungli pakkde bacche ka sahara hai,
pitah kabhi kuch khatta, khabhi khhara hai,

pitah paalan hai, poshan hai, pariwaar ka anushaashan hai,
pitah dhaus se chalne wala prem ka prashasan hai,

pitah rooti hai, kappda hai, makkan hai,
pitah chhote se parindon ka bada aashmaan hai,

pitah niswarth annant pyaar hai,
pitah hai to bachhon ka intezaar hai,

pitah se hi bachhon ke dher saare sapne hain,
pitah hai to baazar ke sab khilone apne hain,

pitah se pariwaar mein pratipal raag hai,
pitah se hi maa ka bindi aur suhaag hai,

pitah parmatama ki jagat ke prati aashakti hai,
pitah grihasta aashram mein uccha sthiti ki bhakti hai,

pitah apne ichhaon ka hannan aur pariwaar ki purti hai,
pitah rakt mein diya hua sanskaaron ki murti hai,

pitah ek jeewan ko jeewan ka daan hai,
pitah duniyan dikhaane ka ehsaan hai,

pitah suraksha hai, sar par haath hai,
pitah nahi to bachpaan anaath hai,

to pitah se bada tum apna naam karo,
pitah ka apmaan nahi, unn par abhimaan karo,

kyuki maa-baap ki kami koi bant nahi sakta,
aur ishwar bhi inki aashishon ko kaat nahi sakta,

vishwa mein kisi bhi devi-devta ka sthaan duja hai,
maa-baap ki sewa hi sabse badi puja hai,

vishwa mein kisi bhi tirtha ki yaatraein byarth hai,
yadi beta ke haathon mein maa-baap ashmartha hai,

woh khushnaseeb hain jo maa-baap ke sath hote hain,
kyuki maa-baap ki aashishon ke hazaron haath hote hain.

har pal dhoondta raha main thikhana maut ka

har pal dhoondta raha main thikhana maut ka,
na jaane kab ho iss zindagi mein saamna maut ka,

woh jo muhje jeene ke liye kehte the kabhi,
unhein to kab ka mila gharana maut ka.

meri bebasi dekho..
ki gaa bhi sakta tarana maut ka.

unki de zindagi to aamant hai mere paas varna,
kab ka ho gaya hota samana mera aur maut ka.

ab to na marne ka haqdaar, na hi jeene ke kaabil,
zindagi boojh si baan chuki hai,

marne se pehle hi mar chuki hai,
ab kis muh se ja kar karoon saamna maut ka.

har pal dhoondta raha main thikhana maut ka,
na jaane kab ho iss zindagi mein samna maut ka.

baba.. aapko tahhe dil se sukariya

apne pitah ke kandhe mein baitha main,
jab unke kandhe par khada ho gaya,
maine kaha apne pitah se...
dekho baba, main tumse bada ho gaya.

baba ne tab kaha...
beta iss khubsurat galatfehmi mein bhale hi jakkade rahna,
lekin mera haath hamesa pakade rahna,

jis din yeh haath choot jaayega,
beta tera yeh hassin sapna tutt jaayega.

duniya vaastav mein itni haseen nahi hai,
dekh tere paau talle abhi zamin nahi hai,

main to baap hoon beta, bahut khush ho jaaunga,
jis din vaastav mein tu mujhse bada ho jaayega.

magar bete kahdhe par nahi,
jab tu zamin mein khada ho jaayega,
yeh baap tujhe apna sab kuch de jaayega,
aur tere kandhe par duniya se chala jaaunga.

pitah na ho to roti hain ziddhein,
khawaaishon ka dher hota hai,
pitah hai to hamesa bacchon ka dil sher hota hai.

iss matlab bhari duniya mein,
woh be-matlab ki kavitaon ka saar hai,
jinko apne sapnon ko chordkar,
bachhon ke sapnon se pyaar hai,

woh mere pitah mera pehla pyaar hai,
woh iss chhoti si duniya mein mere anant sansaar hai.

kandhon par jhullaaya, kandhon par ghumaaya,
uss pitah ki badolat hi, mera jeewan khubsurat ban paya hai.

kya kahun uss pitah ke baare mein,
jisne sochha nahi kabhi khud ke baare mein,
baba aapne mujhe zindagi bhar diya hai,
aapka tahhe dil se behad sukariya hai.

jisse hum papa kehte hain

har ghar mein hota hai woh insaan,
jisse hum papa kehte hain.

sabhi ki khushiyon ka dhyaan rakhte,
har kisi ki ichha puri kerte,
khud gareeb aur bachhon ko ameer banate,
jisse hum papa kehte hain.

badon ki sewa, bhai-behan se lagaao,
patni ko pyaar, bachhon ko dulaar,
kholte sabhi khawaishon ka dwaar,
jisse hum papa kehte hain.

beti ki shaadi, beton ko makaan,
bahuoon ki khushiyaan, damadon ka maan,
kuch aise hi safar mein gujaare woh har shaam,
jisse hum papa kehte hain.

aise hain mere paa..

nariyal ko dekha hai na gaur se?
upar se sakkt, ander se kitna narm-mulayam,
ekdum malaayi sa, bilkul aise hain... mere paa.

maa ki tarah loori nahi sunaate,
meri aanshuon ko aachal nahi thamaate to kya?
anguli pakkad kar zindagi ke kathor dharatal par,
pehla kadam rakh chalna sikhate.. mere paa.

thokar khaa kar girne par

dard ko sehna sikhaate.. mere paa.

maa ki tarah parilok ki sair nahi karate,
duniya ki uchh-nichh bhi nahi samjhate to kya?
mere imhetaan mein mere sath raat bhar jaagte,
mere liye chaai banate.. mere paa.

mere behtar kal ke liye,
apna sunehara aaj kharch karte.. mere paa.

maa ki tarah gale nahi lagate,
meri yaad mein aanshu nahi bahate to kya?
chup-chaap mujhe niharate,
khaamosh nigaahon se sab kuch keh jaate.. mere paa.

mere jaane ke baad udaas akele 

mujhe mere kamare mein dhundate.. mere paa.

tera ehsaas mujhse kabhi door naa ho

mere baad mat dhondhna mere kadmon ke nishan,
main to ek saaya hoon kali raat ka,

ek saaya jiska koi wajood nahi,

janmo se main bhatak raha hoon apni talaash mein,
dubba hua hoon na jaane kaise pyaas mein,

zindagi se khaffa maut ki talash mein,
anjaan se safar mein koi sathi nahi hai mera,
ek safed sa saaya jo shayad mera kafan hai,
roz mujhe dhakne ki firaq mein,

aata hai har raat mere soone ke baad,
lekin usse bach ke bhagne ki koshish mein,
roz thora thora sa mar raha hoon,
bass ussi kafan ka intezaar kar raha hoon,

lakin waise nahi jaise woh mujhh dhakna chhahta hai,
main jee to nahi saka apni marzi se,
lekin mera jism apni marzi se marna chhahta hai,

main maut ko jaise bulaun woh waise hi aaye,
marne ke baad mera dil bhi dharkta rahe,
kiyonki iss dil mein to tu bassi hai,

marne ke baad meri aankhain bhi khuli rahe,
kyonki inn mein tere khwaab sajaye hain,

marne ke baad mere hoonth bhi larzte rahe,
kyonki inko aaj bhi teri pyaas hai,

marne ke baad meri sanse bhi chalti rahe,
kyonki yeh sanse tera naam lekar chal rahi hain,

magar jab mujhe aakhri hichki aaye,
to teri goad naa ho tera anchal naa ho,

tere aanshu meri lash ko nehlatay naa ho,
tere hoonth mere bejaan jism ko chumtay naa ho,

mere rashton mein tujh se kiye waade naa ho,
mere phir zinda ho jaane ke iraade naa ho,

tere saath guzre pal mujh par bojh naa ho,
tera pyar mere paon ki zanjeer naa bane,

meri chhita ki rakh se teri tasveer naa bane,
kash yun zindagi kare bewafai to kitna acha ho,

tera surakh dupatta meri lash se lipta ho,
mera wajood chutki bhar rakh main simta ho,

aur woh rakh teri mang ka sindoor naa ho,
tera ehsaas mujhse kabhi door naa ho,

tera ehsaas mujhse kabhi door naa ho...........!!

hum rahein na rahein mehfilein sada raheingi

hum rahein na rahein mehfilein sada raheingi,
kuch kahein na kahein baatein sada raheingi,

dil ko behlaane ke liye shayari ek marz hai,
koi samjhe na samjhe shayari chalti rahegi,

jo ghar kar gaya hai iss dil mein,
ab ussi ki khatir meri rooh zinda rahegi,

hum rahein na rahein mehfilein sada raheingi,
kuch kahein na kahein baatein sada raheingi.

chuukar teri ruuh ko mere ruuh ka yeh ishaara tha

woh shaam, woh masti, woh shokh nazara tha,
surkh sooraj se nahaya dariya ka kinaara tha.

dubte shams ki garmahat, hamare ishq ki shiddat,
jaise door chitiz pe hamari chahat ka sharaara tha.

jaise do dil mile ho, fiza mein kayi rang ghule ho,
mere lab-o-rukhsaar ko teri ulfat ne sanwara tha.

jaise sham ki khusbu, aanchal mein mehak gayi ho,
daaman mein samaya, tera chehra yaadgar tha.

matwaali, albeli, lehron ke badan pe woh cheeinte,
ret sane mere jism ne, teri khil-khilahat ko pukaara tha.

mere chehare par teri saanson ka machalna,
tere chuwan ki be-khudi mein, mera jism para para tha.

shabnami labon ki aanch se, saansein behak gayi,
mauz-o-masti ke aalam mein mera ruup awaara tha.

meri khwaab aur hasraton ki aandhi jo chal pardi,
mehboob teri baahon mein mera sab tumhara tha.

shafaq kirnein, woh sab fizaayein, dhadkanon ke nagmein,
woh bijli ki chamak, woh gul, inmein hua bebas yeh dil bechaara tha.

saare jahaan ki khushiyan tujhko main nichawar kar doon,
chuukar teri ruuh ko, ‘raaj’ ki ruuh ka yeh ishaara tha.

aate ho kya ab bhi yahaan tum

aate ho kya ab bhi yahaan tum?
pardhte ho kya meri shayari tum?

hai na koi raasta milne ka phir bhi,
tera saaya kahin dhoondta hoon phir bhi.

samajhte ho mere ghum ko kya tum,
yaad karte ho woh suhaane se din tum?

dhoondoon to kahaan main tumhein,
paas apne kaise bulaoon main tumhein.

ishaara kissi tarah se de sakte ho tum,
sapno mein bas ek baar aa sakte ho tum?

jaanta hoon tum ab nahi mere,
na hi mujhe khuch maante ho ab tum.

awaaz apni kya suna sakte ho tum?
apni baahon mein mujhe le sakte ho tum?

honthon ki pyaas na bujhaane di tumhe, 

gale se ek baar phir laga sakte ho tum?

andhere se kya nikal sakte ho tum,
aate ho kya ab bhi yahaan tum?

nahi mili khushi na sahi par uska gham to mila

nahi mili khushi na sahi par uska gham to mila,
ke issi bahane hi sahi hume ek sanam to mila.

sahi hai ke mohabbat haqeekat se door hi rahi,
par issi dard se mohabbat ka humein bhram to mila. 

kaun jaane ke mil jaaye rahe kahi par jakar phir se
issi baat se doston jeene ka humein dum to mila.

mat roko mujhe likhne se mere chahne walo,
ke nagmon ke roop mein hume dil ka marhum to mila. 

yaad hai sari mujhe.. teri mulakate

tera hasna, tera muskurana,
aankhein milte hi.. tera sharmana.

tera chalna, tera milna,
phoolo ki tarah.. tera khilna.

teri chaal, tere baal,
gulabo si rangat wale,
tere surkh gulaabi gaal.

tera baithna, tera uthna,
bina baat ke.. tera ruthna.

tera gussa, tera pyar,
chhoti chhoti baato pe.. teri takraar.

tera aana, tera jaana,
khud jhagad ke.. tera manaana.

tera gaana, tera rona,
mere aagosh mein aake.. tera khona.

teri aankhein, teri baatein,
yaad hai saari mujhe.. teri mulakate.

new year ka intezaar

12 mahino ka intejaar,
phir tum aate ho har saal,
dilon ke beech dooriya,
kuch palon ke liye hi sahi,
mita dete ho har saal,

har koi ek dusre se,
happy new year,
kehne ko hai bekaraar,
mehfilein zama dete ho,
nacha dete ho har saal,

gujre waqt ka andhera,
mita dete ho har saal,
nayi ummeedein,
naye armaan sabke dilon mein,
jaga dete ho har saal,

ab aa bhi jaao na,
mat karwao intezaar,
tere swagat ko,
hum sab hai taiyaar.

chahne par bhi na bhool paaye, lakh jo bhulaya humne

jinke-kan kan mein thi bewafaai ki khushbu,
dil ke aangan mein poudha aaisa mehkaya humne.

gir gaye woh khud hi aapni nazaroo se doston,
jab unka diya zakhm unhi ko dikhaya humne. 

bhale hi khud rote rahe hum sadda sitam se unke,
kabhi kissi baat par unko na rulaya humne. 

yaadein chali aati hain unki jab bhi tannha hote hain,
chahne par bhi na bhool paaye, lakh jo bhulaya humne. 

aaj woh hi sikhlate hain zamane mein tannha rehna,
jinhein kabhi yeh zaalim pyaar tha veeraan zindagi ka,
issliye baad unke saathi, mout ko banaya humne.

pucha jab kabhi humse raaz doston ne khamoshi ka,
aapni mohabbat ka ek alfaaz na batayaa humne.

sab loggo ne yahe jutai doulat zamane bhar ki,
khushiya ke baadle bas ghum hi tha jo jutaaya humne.

tum kabhi na karna mohabbat deewano ki tarha,
har aashiq ko iska kaaran bataya humne.

kash tum kabhi mere sath hote

mohabbat bhare kuch lamhat hote,
kash tum kabhi mere sath hote,

na rahti yeh tannhai aas-paas mere,
agar hathon mein tere hath hote,

mil kar chalte hum raah-e-zindagi,
har kadam mohabbat ke saugat hote,

waadon ke dhor mein bandh jaate hum,
shayad kuch aise hi apne baat hote,

tere mohabbat ki roshni ke saath mein,
maine guzare apne sare din raat hote.

hasrat hai dil mein ek arse se..

iss shehar ki bheed mein ghum-e-ishq ke maare,
zinda hain ab tak yahi badi baat hai pyaare.

yeh hansta hua chand, yeh tim-timate sitare,
magar yeh dil hai ek jarre ke sahare.

hasrat hai koi pyar se dekhe mujhe,
arman hai koi phool humein bhi dil se pukare.

har subah meri subah pe roti rahi shabnam,
har raat meri raat pe hanste rahe taare.

hasrat hai dil mein ek arse se,
koi mere uljhe naseeb ko saware.

mere gazalon ko mere sath gaao ki andhera hatte

dil ko roshan banao ki andhera hatte,
nafraton ko bhagao ki andhera hatte,

aao dil ki mehfil mein, aao ki andhera hatte,
rukh se julfein hatao ki andhera hatte,

do pyar ke geet gaao aur muskuarao,
sare ghum ko bhulao ki andhera haate,

pyar ke noor se khaiyan pat do nafraton ki,
jahan ko jagmagao ki andhera hatte,

chand se mukhde ki tareef mein kuch kehne do,
mere gazalon ko mere sath gaao ki andhera hatte,

ek “raaj“ hi hai aapke nazaron mein kabse,
jaam-e-ulfat pilao ki andhera hatte.

tujhse jo maine wada kiya tha

armano ko dil mein dafen kar diya,
khwahisho ka galla ghot diya, 

tujh se jo maine wada kiya tha,
apne aap ko tujh se juda kar diya. 

dard aaj bhi seene min uthata hai,
jalan aaj bhi dil mein hoti hai,

teri ek jhalak dekhne ko,
taras aaj bhi ankhoon mein jaagti hai.

apne anshu ko pee ke,
iss taras ko bujhata hoon, 

armano ki arthi pe
khud hi phool chadhata hoon. 

mere naseeb tu nahi hai,
par teri yaadon koi mitta nahi sakta, 

iss jahan se mitt sakta hoon magar
teri mohobbat iss dilse mitt nahi sakti.

kaisa hoon kis haal mein hoon

kaisa hoon, kis haal mein hoon.. usko kya khabar,
achcha hoon ya bura hoon, usko kya khabar?

mulaakat ki usse hui barso ki sada,
yaad aata hai mera chup rehna, 

uski meethi baaton ki adaa,

kis kadar tute hain pal woh mohobbat waale,
kis kadar chubhte hain pal yeh yaadon waale,

tannha hoon ya tuta hoon, usko kya khabar,
kya khabar thi dil ki baaton mein haal-e-dil hai chupa,

chand yaadon par dard-e-dil hai utha,
jaane kyu sochta hoon guzra kal  bata,
jab kisi ko nahi koi matlab,
zinda hoon ya guzra hoon, usko kya khabar.

kaisa hoon, kis haal mein hoon usko kaya khabar,
achcha hoon ya bura hoon, usko kaya khabar?