aise hote hain pitah

jeevan mila jinse, woh jeevandaan hai pitah,
pukara jaaye chaahe kisi bhi bhasha mein
kehkar papa, baba, babuji...
har boli mein inke liye hai 

wahi pyaar aur samman bhara.

thaame jinki ungli bachpan challa,
jinki majboot kandhon par baithkar duniya dekhi,
godh par baith kiye nakhere dher jinke,
jinhone apne sneh se hamein bada kiya,
woh hai pitah!

choti se choti jeet par bhi jinse shabashi mili,
har haar ko jinhone sikh bataya,
nirash ko door bhagaya,
jeevan ki sachaai se hamein rubaru karaya,
sahi aur galat mein antar samjhaya,
jinhone apne bachoon ke sukh mein hi apna sukh paya,

bachoon ke liye har pareshani haskar uthaaya,
jinki puri sansaar unke bachoon mein hi samaya,
woh hain pitah!

kabhi kadak ho jaate to kabhi naram bade,
lagate hain pabandiyan to kabhi dete hain choot puri,
kabhi hansaate hain to kabhi rulaate hain,
kabhi maa ki daat-maar se bachaate hain,
to kabhi khud hi chapat laga dete hain,
aise hote hain pitah!

pyaar se thapki dekar sulaate hain,
to kabhi khana banakar apne haathon se bhi khilaate hain,
jarurat ho to maa ke bhi saare kartavya nibhate hain,
din raat mehnat kar apne bachoon ke bhavishya ko sawarte hain,
har din, har pal unke ujjwal bhavishwa ke hi sapne bunte jaate hain,
apne har saans ko pitah apne bachoon par lutaaate hain,
kabhi kathor hokar to kabhi mom ki bhaati pighal jaate hain pitah!

aapki bhumika kayi roop se hai...
dhoop gar jalaye to chaao ban jaate hain,
wahi samay aane par ussi dhoop mein tapkar jeena sikhate hain,
baatein jinki hamesa maargdarshan karti hai,
kathinayion se lardte huye, viparit paristhithi mein bhi,
apne sidhanton par chalna sikhate hain,

sath mein ho yaa yaad mein,
inki upastithi hamesa mann ko sukun pohuchati hai,

aise hote hain pitah!

majhdhaar mein banke rahe pattvaar pitaaji

duniya ko bataate rahe majhdhaar pitaaji,
majhdhaar mein banke rahe pattvaar pitaaji,

saaya bhi unhi se hai, sahaara bhi unhi ka,
bachchon ke liye dar hai aur deevaar pitaaji.

chullha na pade thanda kabhi isleye aksar,
hansakar gaye hain kaam par beemaar pitaaji,

maa ke bimaari mein bachche, roti aur baratan,
aksar nibhaate maa ka bhi kiradaar pitaaji.

hain dost, alaarm, guru, to pabandiyaan kabhi,
thappad, nasihatein, kabhi akhabaar pitaaji.

maa-baap ki sewa hi sabse badi puja hai

pitah jeewan hai, sambal hai, shakti hai,
pitah shristi ke nirmaan ki abhi-bhyakti hai,

pitah ungli pakkde bacche ka sahara hai,
pitah kabhi kuch khatta, khabhi khhara hai,

pitah paalan hai, poshan hai, pariwaar ka anushaashan hai,
pitah dhaus se chalne wala prem ka prashasan hai,

pitah rooti hai, kappda hai, makkan hai,
pitah chhote se parindon ka bada aashmaan hai,

pitah niswarth annant pyaar hai,
pitah hai to bachhon ka intezaar hai,

pitah se hi bachhon ke dher saare sapne hain,
pitah hai to baazar ke sab khilone apne hain,

pitah se pariwaar mein pratipal raag hai,
pitah se hi maa ka bindi aur suhaag hai,

pitah parmatama ki jagat ke prati aashakti hai,
pitah grihasta aashram mein uccha sthiti ki bhakti hai,

pitah apne ichhaon ka hannan aur pariwaar ki purti hai,
pitah rakt mein diya hua sanskaaron ki murti hai,

pitah ek jeewan ko jeewan ka daan hai,
pitah duniyan dikhaane ka ehsaan hai,

pitah suraksha hai, sar par haath hai,
pitah nahi to bachpaan anaath hai,

to pitah se bada tum apna naam karo,
pitah ka apmaan nahi, unn par abhimaan karo,

kyuki maa-baap ki kami koi bant nahi sakta,
aur ishwar bhi inki aashishon ko kaat nahi sakta,

vishwa mein kisi bhi devi-devta ka sthaan duja hai,
maa-baap ki sewa hi sabse badi puja hai,

vishwa mein kisi bhi tirtha ki yaatraein byarth hai,
yadi beta ke haathon mein maa-baap ashmartha hai,

woh khushnaseeb hain jo maa-baap ke sath hote hain,
kyuki maa-baap ki aashishon ke hazaron haath hote hain.

har pal dhoondta raha main thikhana maut ka

har pal dhoondta raha main thikhana maut ka,
na jaane kab ho iss zindagi mein saamna maut ka,

woh jo muhje jeene ke liye kehte the kabhi,
unhein to kab ka mila gharana maut ka.

meri bebasi dekho..
ki gaa bhi sakta tarana maut ka.

unki de zindagi to aamant hai mere paas varna,
kab ka ho gaya hota samana mera aur maut ka.

ab to na marne ka haqdaar, na hi jeene ke kaabil,
zindagi boojh si baan chuki hai,

marne se pehle hi mar chuki hai,
ab kis muh se ja kar karoon saamna maut ka.

har pal dhoondta raha main thikhana maut ka,
na jaane kab ho iss zindagi mein samna maut ka.

gujarte har lamhon mein.. aapko dhund leta hoon baba

aankhein michh kar soone se pehle,
jazbaat pighal kar roone se pehle,
jab aalfaz sinne mein dafan ho jaate hain,
tab yaadon se palkein bhigone se pehle,
aapke ashk se baatein karne lagta hoon,
tashveeron ko mana kar, unhi se ruth leta hoon baba,
gujarte har lamhon mein.. aapko dhund leta hoon baba !

bin mausam ki barsaat mein kabhi bheegne lagta hoon,
raat chaadar lapet kar thand ke maare jab kappne lagta hoon,
tab lagta hai jaise apna chaadar aap mujhe ordha rahe ho,
aur garm haathon ki narm ungliyon se mere baalon ko sehla rahe ho,
aapke hone ka ehsaas bhar se hi, har dard mein sukkun paa leta hoon baba,
yaadon ki chaadar ordhe har raat... aapko dhund leta hoon baba !

kisi raat sapnon mein puraane school pahuch jata hoon,
shaam dhalne par jab khil-khilate baccho ki toliyan nikalne lagti hai,
tab naa jaane dil ko kaisi aas bandh jaati hai,
meri nigaahein un cheharon mein kuch dhundane lag jaati hai,
dhundata hoon un haathon ko jinme jhaalmudi ki thayali hogi,
mera intezaar karti huyi, apni priya scooter kahi kadi hogi,
jispar sawar hone par ke khayaal se hi main jhoom leta hoon baba,
har nukkad, gali, chauraahe mein, aapko dhund leta hoon baba !

bheed mein akelapan ka ehsaas aapke bin hota hai,
jab kabhi bhi pariwaar mein kisi ka janam-din hota hai,
sabse chupte-chupaate koi tauffa le aaoge,
jo humse naa bujhi, woh mom-battiyan aap bujhaaoge,
bas yehi sochkar jaan bujhkar, aankhein mund leta hoon baba,
kabhi na khatam hone wale intezaar mein.. aapko dhund leta hoon baba !

woh aakhri pal nahi bhoolta mujhse kisi bhi haal mein,
aap zindagi ki door thaame ashpataal mein,
mujhse tab yeh kaha gaya ki kuch hi pal ab sesh bachi hai,
laga jaise khusiyon ki duniya ab dher ho chuki hai,
lekin maut ke farishton se chupte-chupaakar,
rakha tha aapne kuch saansein bachaakar,
aapki pairon ko apne hatheliyon se malte huye,
maine haathon mein aapke pairon ko jakkad rakha tha,
kuch naa keh kar bhi kitna kuch keh rakha tha.

aapse thi saari muskuraahat, aap khusiyon ke jahan the,
mere aanshu tab sukh chuke the, jab aap be-jubaan the,
ab to bas aapki tasveeron se baatein kar leta hoon,
dil kaagaz ban jaata hai, jispar dard apna likh deta hoon,
ussi dard ki dabbi huyi aawaz mein, likhe huye har alfaaz mein,
aapko dhund leta hoon baba,
gujarte har lamhon mein..
aapko dhund leta hoon baba !

jaani pehchani si, ek khoobsurat yaad

kabhi aati hai khamoshi se, chupke se,
sargoshi se, andheri raat mein,

bheegi barsaat mein, kabhi veerane mein,
kabhi anjaane mein, kabhi mehfil mein,

kabhi tanhai mein, koi khabar kyun aati hai,
yeah waqt ke kis wajah se, kis ke liye,

kis ki khatir, kis ke liye,
kya batane, yeah kya hai?

ek ehsaas hai, ek pyaas hai,
phir bhi acchi lagti hai,

anjani si, baygani si,
pehchani si, ek khoobsurat yaad.

woh bhi kya din the jab bas khilone tutta karte the

woh bhi kya din the jab bas khilone tutta karte the,
girte the aanshu, par do pal ko rutha karte the.

khil-khila kar hansti thi khushiyaan,
alvida keh kar bhi kahan chhuta karte the.

baras ke sawan humein hansaya karta tha,
pyara sa bachpan hardum khushiya lutaya karta tha,

baba ke kandhon par baith dekhte the duniya,
sara zamana hum par sar jhukaya karta tha.

woh din woh bachpan bahut yaad aata hai,
woh zindagi phir jeene ko dil lalchaata hai.

sawal tujhse aye bhagwan aur niyati se bhi,
kyon itni jaldi ek baccha bada ho jata hai?

bas yun hi yaadein dil mein sametey, yeh waqt gujarta jata hai

aapki kami khalti hai mujhe, yeh khaalipan tardpata hai,
bas yun hi yaadein dil mein sametey, yeh waqt gujarta jata hai.

ab pata chalta hai ki.. yeh zimmedariyon ka bojh kitna bhaari hai,
khud se jyada apno ki khusiyan pyaari hai,

daurdne pardte hain kadam, pakadne ko zindagi ki raftaar,
aaj to gujar gaya jaise taise, kal bhi hai aane ko taiyaar.

aapki majbooriyon ka mujhe ab ehsaas hota hai,
duniya hoti hai matlabi, aur ghar ka har saksh khaas hota hai.

maa ke baad pita hi samajhta hai khamosi bachhon ki,
muskilon se bachane ke liye, pita himmat ki deewar hota hai.

har daat pe pyaar jo rahta hai, woh yaad bahut ab aata hai,
har beeta lammha ab to bas, aankhon mein aanshu laata hai.

tashveer basi hai dil mein jo, jeene ka hausla deti hai,
isse tarah se bas ab to, yeh waqt gujarta jata hai.

aapki kami khalti hai mujh mein, yeh khaalipan tardpata hai,
bas yun hi yaadein dil mein sametey, yeh waqt gujarta jata hai.

Miss You Baba !!

waqt beet gaya lekin reh gayi hai waqt ki parchaai

zindagi ke andheron mein woh jalti mashaal the,
musibaton se bachhane ko woh pariwaar ki dhaal the.

kaha jee paaye the woh apni zindagi apne hisaab se,
pita hamare koi aam saksh nahi, tyaag ki ek misaal the.

waqt beet gaya lekin reh gayi hai waqt ki parchaai,
aapke jaane ke baad kuch bachhi hai to bas tanhaai.

nikal padte hain aankhon se aanshu aur dil baith jaata hai,
jab bhi yaad aati hain baatein jo aapne thi bataayi.

ek pita ki ahmiyat kya hai,

iska jawab waqt mere samane laya hai,
kin haalaton se gujaare honge humein paalane ke liye aap,
yeh aaj mujhe samajh aaya hai.

kabhi dar lagta tha aapke daat se,
aaj aapki khaamoshi mujhe satati hai,
mujhe maalum hai ki ab aap nahi aane waale,
phir bhi aapki yaad mujhe aksar rulaati hai.

jab bhi kami khilti hai aapki,
aapki yaadon se mulakaatein kar leta hoon,
ab aapse milna mumkin kaha isleye,
ab aapki tasweer se baatein kar leta hoon.

sudhaar loon main gushtakhiyan zindagi ki,
ab galti karne par mujhe kaha koi daat-ta hai,
akele hi jujhta hoon ab main zindagi se,
aapki tarah mere dard kaha koi baat-ta hai.

aise the mere pitah

bargad ki gehri chaav jaise,

zindagi ki dhup mein ghanne shaaye jaise,
the mere pitah.

ghar par ishwar ka roop jaise,
chubhati dhoop mein sahlaate,
mere pitah

bacchon sang bacche ban khelte,
unko uphaar dilla kar khushi dete,
bacchon ko yun hi muskuraao ki dua dete,
aise the mere pitah.

sankat mein pathwaar ban khade hote,
aashray sthal jaise the mere pitah.

bund bund sab ko sameet-te,
andhere mein de kar hausla,
kehte mere pitah,
tumko kiska dar hai?

ghumon ki bheed mein hasna sikhate,
mere pitah.
aur apne dum par tufaanon se lardna,

kisi ke aage tum nahi jhukna,
yeh sikhalaate mere pitah.

pariwaar ki himmat aur vishwas the,
umeed aur aas ki pehchaan the mere pitah.

baba.. aapko tahhe dil se sukariya

apne pitah ke kandhe mein baitha main,
jab unke kandhe par khada ho gaya,
maine kaha apne pitah se...
dekho baba, main tumse bada ho gaya.

baba ne tab kaha...
beta iss khubsurat galatfehmi mein bhale hi jakkade rahna,
lekin mera haath hamesa pakade rahna,

jis din yeh haath choot jaayega,
beta tera yeh hassin sapna tutt jaayega.

duniya vaastav mein itni haseen nahi hai,
dekh tere paau talle abhi zamin nahi hai,

main to baap hoon beta, bahut khush ho jaaunga,
jis din vaastav mein tu mujhse bada ho jaayega.

magar bete kahdhe par nahi,
jab tu zamin mein khada ho jaayega,
yeh baap tujhe apna sab kuch de jaayega,
aur tere kandhe par duniya se chala jaaunga.

pitah na ho to roti hain ziddhein,
khawaaishon ka dher hota hai,
pitah hai to hamesa bacchon ka dil sher hota hai.

iss matlab bhari duniya mein,
woh be-matlab ki kavitaon ka saar hai,
jinko apne sapnon ko chordkar,
bachhon ke sapnon se pyaar hai,

woh mere pitah mera pehla pyaar hai,
woh iss chhoti si duniya mein mere anant sansaar hai.

kandhon par jhullaaya, kandhon par ghumaaya,
uss pitah ki badolat hi, mera jeewan khubsurat ban paya hai.

kya kahun uss pitah ke baare mein,
jisne sochha nahi kabhi khud ke baare mein,
baba aapne mujhe zindagi bhar diya hai,
aapka tahhe dil se behad sukariya hai.

ek puraani album

 yaadon ki khidkiyon par baitha, beete kal ko jhakk raha tha,
aaj puraani almaari mein, zindagi talaash raha tha.

bhoole bishre geeton ko aaj nayi sargam milli,
dhool se sanni, kone mein padi, ek puraani album mili.

kaale safed liwaz mein lipti, guzare daur ki kahani thi,
shabd nahi the jisme koi, tasweeron ki jubaani thi.

meri muskurahat par the sab nishaar,
main khusiyon ka humsaya tha,
iss tasweer mein woh pal kaid hain,
jab main duniya mein aaya tha.

aankhon mein yaadein bhar aayi, dil tardpar rooya hai,
ek tasweer mein kisi ne budhi daadi ko sanjoya hai.

kahi holi ke rang kaid hain, kahi diwali ki raat hai,
kahi janamdin mana raha hoon main, jaise kal hi hi baat hai.

woh school ka pehla din ho, ya collage mein ki shaitaani,
tasweeron mein simat kar rah gaya, bachpan aur jawaani.

apni har baat kehne se pehle izzajat liya kerta tha,
yeh tasweer tab ki hai,  jab main office jaaya kerta tha.

ghumon se uljhe zindagi ki khuli tab takkdeer thi,
tumhein dekh kar pasand kiya tha, yehi to woh tasweer thi.

aage kuch tasweeron mein kaid, har ek pal hain sunahare,
tum paas mere baithi the, haathon mein the haath hamare.

kuch tasweeron mein aawaz kaid hai, dhol nagade, sehnaai ki,
woh pehla ghar humene liya, woh scooty pehli kamayi ki.

kuch tasweeron mein aanshu hain, jab behno ki bedaai ki,
chote bhaai ke sahare humare ghar mein bhi ek bahu aayi thi.

humsab ko chordkar baba, kyu ek din safed liwaz mein lipat gaye,
haar lagi sunahari frame mein, kyu tum jaa kar simat gaye.

tumhare bhaaiyon ne baba gaao ke ghar ko baat diya,
mere kamjoor haat na pahuch sake, photo itne upaar tang diya.

sabhi pariwaar waalon ne diya mujhe itna pyaar hai,
ab aankho mein dikhata mere tasweer ho jaane ka itnezaar hai,

raakh bankar rah jaauga, baha denge mujhe sangam mein,
tasweer bana dhool khaaunga, kisi purani album mein.

jisse hum papa kehte hain

har ghar mein hota hai woh insaan,
jisse hum papa kehte hain.

sabhi ki khushiyon ka dhyaan rakhte,
har kisi ki ichha puri kerte,
khud gareeb aur bachhon ko ameer banate,
jisse hum papa kehte hain.

badon ki sewa, bhai-behan se lagaao,
patni ko pyaar, bachhon ko dulaar,
kholte sabhi khawaishon ka dwaar,
jisse hum papa kehte hain.

beti ki shaadi, beton ko makaan,
bahuoon ki khushiyaan, damadon ka maan,
kuch aise hi safar mein gujaare woh har shaam,
jisse hum papa kehte hain.

aise hain mere paa..

nariyal ko dekha hai na gaur se?
upar se sakkt, ander se kitna narm-mulayam,
ekdum malaayi sa, bilkul aise hain... mere paa.

maa ki tarah loori nahi sunaate,
meri aanshuon ko aachal nahi thamaate to kya?
anguli pakkad kar zindagi ke kathor dharatal par,
pehla kadam rakh chalna sikhate.. mere paa.

thokar khaa kar girne par

dard ko sehna sikhaate.. mere paa.

maa ki tarah parilok ki sair nahi karate,
duniya ki uchh-nichh bhi nahi samjhate to kya?
mere imhetaan mein mere sath raat bhar jaagte,
mere liye chaai banate.. mere paa.

mere behtar kal ke liye,
apna sunehara aaj kharch karte.. mere paa.

maa ki tarah gale nahi lagate,
meri yaad mein aanshu nahi bahate to kya?
chup-chaap mujhe niharate,
khaamosh nigaahon se sab kuch keh jaate.. mere paa.

mere jaane ke baad udaas akele 

mujhe mere kamare mein dhundate.. mere paa.

o maai - o maai...

ambar ki uchaai, dharti ki yeh gehraari,
tere hridaay mein samayi.. o maai - o maai.
tere mann amrit ka pyaala, yehi kaaba yehi shivaala,
teri mamta paawan-daayi, o maai - o maai.

hamesa tere sath hi rahoon, main bankar tera humjoli,
tere pas naa jaaun.. chip jaaun, yuh kehlun main aankh micholi,
pariyon ki kahani suna de, koi mithi loori gaa de,
kar de sapna sukhdaayi, o maai - o maai.

sansaar ke taane baane se ghabrata hai mann mera,
inn jhuthe rishton-naaton mein, bas pyaar hai tera hi saccha,
sab sukh-dukh mein dhal jaaye, teri baahein jo mil jaaye,
mil jaaye mujhe khudaayi, o maai - o maai.

phir koi shararat ho mujhse, naaraz karun phir tujhko,
phir gale pe thappi maar ke, shinne se laga le mujhko,
bachpan ki pyaas bujha de, apne haath se phir khila de,
pallu mein band mithai, o maai - o maai.

HAPPY MOTHER'S DAY...!!

guzre huye kal ki kitaab

apne guzre huye kal ki kitaab dekh raha hoon,
zindagi ke zulmon ke hisaab dekh raha hoon.

mujh ko jalaane tum bhi aaoge mere yaar..
sach kehte ho, ya main khwaab dekh raha hoon?

tere gham to seh liye, ab gairon ki baari hai,
aanshu pee chuka, sharaab dekh raha hoon.

aap kehte ho ke meri aankhein namm nahi,
main apne aayino mein sailaab dekh raha hoon.

nahi mujhko koi umeed unke aane ki,
bas youn hi raahon ko janaab dekh raha hoon.

waqt ke sath dayarein badaltein logg

waqt ke sath dayarein badaltein logg,
jab jee chaaha anjaan ho jaatein yeh logg.

jab marrzi padein dil-daar ho jaatein logg,
waqt be waqt sanngdil ho jaatein yeh logg.

apni marzii ke maalik hain yahan sabhi logg,
patharr ko bhi tord kar khush ho jaatein yeh logg.

kisi ki kamazori ko garz samajh kar muskuraatein logg,
nafraton ke shehar banatein aur 

uss mein basar kartein yeh sabhi logg.

bas yun hi haste haste chala jaaunga

bas yun hi haste haste chala jaaunga,
doston ab shayad main laut kar nahi aaunga.

par yeh bhi to ek sach baat hai, jo bithe aap sab ke saath,
woh mitthe pal main kabhi nahi bhool paaunga,

par aaj main bhi yahan se khali haath nahi jaaunga,
main jaroor apni yaadon ki mehek yahi chhord jaaunga.

jaanta hoon kahi dil tutte hain meri nadaaniyon se,
par aaj jaate jaate main aap sab se maafi maangna chahunga,

aap ko jo bhi ho mujhse sikhwe gile.. ser aankhon par,
main aaj aap sabhhi ko dua dete jaaunga.

aaj hoon kuch doston ke dilo mein,
par ek din unki yaadon se bhi mit jaaunga.

aaj hoon thoda mashoor aap doston ki badolat,
par waqt ke chalte hi issi bheed mein kahin kho jaaunga.

bas yun hi haste haste chala jaaunga,
doston ab shayad main laut kar nahi aaunga.

jaane kis roz hum yeh baat samajh paayenge

jhoote sapne aankhon mein kab tak hum sajaayenge,
tut jaane par unke.. phir aanshu hum bahaayenge,

hain hum insaan, insaan hona khud mein ek sazaa,
jaane kis roz hum yeh baat samajh paayenge.

jeena humko hai khokle rivaazon ko nibhaate huye,
dharm-o-mazhab ke issi bandhan mein jeeye jaayenge,

hote jo pancchi, naa baandh paati sarhadein bhi humein,
hain jo insaan, bebas bin pankhon ke kahaan jaayenge?

reh jaayegi yeh zindaagi bhi ek samjhauta bankar,
jaan kar bhi hum kuch naa kar paayenge.

kabhi na bhool paau, woh kahani hai pitah

kabhi abhimaan to kabhi swabhimaan hai pitah,
kabhi dharti to kabhi aasmaan hai pitah,
janam diya hai agar maa ne,
jaanega jisse jag, woh pehchaan hai pitah.

kabhi kandhe par bitha kar mela dikhata hai pitah,
kabhi banke ghoda, ghumaata hai pitah,
maa agar pairon pe chalna sikhati hai,
to pairon pe khada hona sikhata hai pitah.

kabhi rooti to kabhi paani hai pitah,
kabhi budhaapa to kabhi jawani hai pitha,
agar maa hai maasum si loori,
to kabhi na bhool paau, woh kahani hai pitah.

kabhi hansi to kabhi anusaasan hai pitah,
kabhi maun to kabhi bhaasan hai pitah,
maa agar ghar mein rasooyi hai,
to chalta hai jisse ghar woh raashan hai pitah.

kabhi khawaab ko pura karne ki zimmedaari hai pitah,
kabhi aanshuon ke chippi lachaari hai pita,
maa agar bech sakti hai jarurat pe gehne,
to jo apne ko bech de woh baypaari hai pitah,

kabhi hansi aur khushi ka mela hai pitah,
kabhi kitna tannha aur akela hai pitah,
maa to keh deti hai apne dil ki baat,
sab kuch samet ke aasman sa failaa hai pitah.